Chet Baker名曲「Everything Happens to Me」好多時都令我身同感受，尤其是入戲院時…原來有些打擊是永不磨滅的。
「我地今日唔係做蜘蛛俠喎，部戲做完啦!!」普慶戲院那個搣飛既阿叔，對住當時只有六歲，仲一邊唱緊Spider-Man, Spider-Man, Does whatever a spider can..一邊喜孜孜準備入場既我，講左呢句我完全聽唔明白既說話。呢部70年代既真人版蜘蛛俠明明剛剛開畫，我拉著媽咪係第一個周末就來睇，明明個塊超巨型即日上映既「蜘蛛俠」壁報仲掛住戲院外牆。而二樓超等入口那富麗堂皇既樓座仲有一個巨型既蜘蛛俠牌係我面前，阿叔點解你會話落左畫呢??。佢當然無回答我，只係指住我背後既lobby card話: 我地今日做呢套「點指賊賊」，仲好睇啦。吓?? 傻架咩，呢個世界又點會有戲好睇過我既「蜘蛛俠」真人版呢?
媽咪退錢換飛後，就解釋俾我聽，因為無人鐘意睇「蜘蛛俠」，所以戲院突然換畫，乜咁都得架咩，票房收入真係咁重要? 呢個事實，1979年既我已經體會過。
蜘蛛俠電影好像一個魔咒咁，纏繞不放
「我們電腦發生小故障，請等一下」，銀幕上蜘蛛俠正阻止火車衝向斷車軌之際，電影突然斷片!!2004年，我身在上海工作，難得有一天假期就跑出市區看電影，當時有戲院正放映「蜘蛛俠2」imax版，嘩CRYSTAL CLEAR喎，雖然國語配音，蜘蛛俠變成蜘蛛人，都無所謂啦，CRYSTAL CLEAR喎。點知，成部戲每當係最緊張關頭時就斷片，戲院員工走出來解畫，一時又話停電，(停咩電，成間放映院都著哂燈)，一時又話電腦有問題，之後斷斷續續，斷左片又唔播返之前個段，所以基本上，我到而家都仲未睇過全套「蜘蛛俠2」….
5分鐘「電視機4:3版」無間3
以為國內戲院渣，原來香港一樣唔爭氣，銅鑼灣JP最後一日one show only做「無間道3之終極無間」，賣完哂廣告套片正要開始，點知大銀幕唔聽話，拉闊系統失靈，變唔到闊銀幕，最後逼住睇左5分鐘「電視機4:3版」既「無間3」，戲院又著番哂燈叫我地散場。我立即錢都唔退，跑去時代廣場UA。原來在銅鑼灣街上疾走係幾惹人注目既事，可能我速度頗快，左穿右插，終於引來一對行孖咇既軍裝差人注意，「先生，咁急去邊呀，拎張身份証來睇下。」
大佬，我趕住去睇戲呀，其中一個軍裝話「去睇戲駛唔駛跑咁快呀」，係囉睇戲啫，點解會被差佬查我身分證架。我解釋一大餐JP事件，個差佬都愕然:「咁都得?」係囉，你仲阻住我，最後我連UA時代個場「無間3」都趕唔切囉。
